Ti Langit
Idi un-unana nga aldaw, nababa pay idi ti langit ket dagiti tattao maisab-it da ti sagaysay, kuentas, tako ken dadduma pay nga alikamen.
Maysa nga aldaw, nangrugi nga agluto ti pangrabii ti maysa a babai sakbay a sumangpet ti asawa na nga aggapu idiay taltalon. Adda met ti anak na iti indayon a sibibitin diay langit. Kabayatan ti panagbayo na, isu met ti panagsangit ti anak na. Dinardaras na ti nagbayo ngem gapu ta nababa unay ti langit ken matukno ti al-o daytoy, saan na a mapardasan ti agbayo. Iti pungtot na, nakasangit a nagkuna, " No saan koma unay a nababa iti langit, naileppas ko koman toy panagbayok!" Saan na pay la a nalpas ti nagsao idi adda napigsa nga ungor ket nagpangato metten ti langit, nairaman amin dagiti naibitin sadiay, pati diay ubing ti indayon, ti banga ken ti apoy.
Manipud idin nakangat-ngaton ti langit. Daydi banga ken apoy nagbalin nga init, ti sagaysay nagbalin a bulan. Adda sinantao iti bulan ta isu daydi ubing nga adda iti indayon. Nagbalin a bitbituen daydi kuentas. Daydi tako isu metten ti ammo tayo ita a "Big Dipper" ken "Small Dipper"
